Nagapakita sang suporta ang Hawud International Charity Foundation kag Hawud Welfare Philippines Inc. sa Dugong Bombo 2026 sang Bombo Radyo Philippines paagi sa paghatag sang sponsorship kag pagbulig sa ginpatigayon nga bloodletting activity sa KCC Mall of Marbel.
Sa interview sang Bombo Radyo Koronadal, ginpahayag ni Marinel Apelyido sang Hawud Welfare Philippines Inc. nga kabahin sang ila misyon ang pagsuporta sa mga programa nga nagatumong sa kahimsog kag kaayuhan sang komunidad.
Suno kay Apelyido, nagaserbisyo na ang ila organisasyon sa komunidad halin sang 2020 sa idalom sang pagpanguna sang founder nga si Arlene Selario-Gay nga naga-base sa United States.
Dugang pa niya, nagapatigayon man sila sang feeding program para sa mga malnourished nga kabataan sa Central Elementary School kada adlaw sang Lunes kag Miyerkules.
Ginpabutyag man ni Apelyido ang ila pagpasalamat sa kahigayunan nga mangin kabahin sang Dugong Bombo 2026, nga naghatag sang oportunidad nga makasuporta sa blood donation initiative kag makabulig sa mga pasyente nga nagakinahanglan sang dugo.
Gin-agda man niya ang publiko nga padayon nga suportahan ang mga programa sa pagdonar sang dugo bangud ang tagsa ka donasyon may daku nga papel sa pagluwas sang kabuhi.
