Nagapabilin nga mabakod ang kaso nga plunder batok kay anay House Speaker Martin Romualdez sa kaangtanan sang ginapatihan nga ₱7.4 bilyon nga korupsyon sa gobyerno, suno kay Ombudsman Jesus Crispin “Boying” Remulla.
Ginklaro ni Remulla nga wala nagakahulugan nga nagaluya ang kaso batok kay Romualdez bisan pa sang pahayag sang isa ka representante sang Anti-Money Laundering Council (AMLC) sa ginpatigayon nga hearing.
Suno sa Ombudsman, nagalaum ang ila opisina nga may dugang pa nga mga testigo kag ebidensya nga mapresentar agud mapabakod ang mga alegasyon batok sa anay lider sang Kamara.
Sa hearing para sa aplikasyon sang piyansa ni Romualdez sa kaso nga plunder, ginbunyag sang AMLC representative nga may kabug-usan nga ₱560 milyon nga nagsulod sa bank accounts sang anay House Speaker samtang ara pa siya sa puwesto.
Apang ginklaro sang AMLC nga wala sila sang ebidensya nga nagapakita nga ang nasambit nga mga pondo naghalin sa ilegal nga aktibidad ukon direkta nga ginhalinan sang mga proyekto sa flood control.
Bangud sini, nangin sentro sang pag-usisa sa hearing ang pagtino sa matuod nga ginhalinan sang kwarta kag kun may direkta ini nga kaangtanan sa ginapatihan nga korupsyon sa mga proyekto sang gobyerno.
Padayon naman nga ginapabakod sang Office of the Ombudsman ang ila kaso paagi sa dugang nga ebidensya kag testimonya agud masabat ang mga pamangkot nga nagaluntad sa pag-uswag sang kaso.
