Nadiskubrehan ang bag-o nga lava dome sa summit crater sang Mayon Volcano, samtang nagapabilin sa Alert Level 3 ang bulkan bangud sa padayon nga pagtaas sang posibilidad sang makatalagam nga paglupok.
Suno sa Philippine Institute of Volcanology and Seismology (PHIVOLCS), nagakahulugan ang Alert Level 3 nga ang magma yara na sa may crater kag mahimo magtuga sang pag-ilig sang lava, pyroclastic density currents, pagkatiphag sang mga bato kag ashfall.
Bangud sini, hugot nga ginapatuman ang mandatory evacuation sa sulod sang 6-kilometer Permanent Danger Zone (PDZ), samtang ginapanugyan ang dugang nga paghalong sa mga lugar sa sulod sang 7-kilometer Extended Danger Zone (EDZ).
Una nga natukiban paagi sa satellite imagery ang pag-usbong sang bukol sa salog sang crater sang Nobyembre 2 tubtob 4, 2026, antes ini nakita sa close-up camera sang Mayon Volcano Observatory.
Ang pagporma sang lava dome nagapakita nga nagasaka ang magma sa sulod sang bulkan kag
mahimo magresulta sa pag-ilig sang lava ukon mas mabaskog nga eksplosibo nga paglupok.
Padayon naman ang pagbantay sang PHIVOLCS sa aktibidad sang Mayon paagi sa nagkalainlain nga instrumento agud mahatagan sang nagakaigo nga paandam ang mga apektado nga komunidad.
