Magahatag ang Department of Social Welfare and Development (DSWD) sang tig-₱10,000 nga bulig pinansyal kag mga pakete sang pagkaon sa mga tag-iya sang food stalls kag mga tindero sa Pasay kag Parañaque nga maapektuhan sang temporaryo nga pagsira sang ila mga baligyaan bangud sa seguridad para sa ASEAN Summit.
Suno kay DSWD Secretary Rex Gatchalian, ginsugdan na ang paghatag sang bulig sang Domingo agud mabuligan ang mga tindero nga madulaan anay sang pangabuhian samtang ginapatuman ang mga tikang sa seguridad para sa pag-abot sang mga lider sang nagkalain-lain nga pungsod.
Nagpangayo man sang pasaylo si Gatchalian sa mga apektado kag ginpahayag nga bisan importante ang ASEAN Summit, dapat hatagan man sang pagtagad ang pangabuhian sang mga Pilipino.
Sa karon, 30 na ka establisimyento ang nakabaton sang tig-₱10,000. Ginapaabot nga makumpleto sa Biyernes ang paghatag sang bulig, lakip ang para sa 1,300 ka tindero kag ila mga pamilya.
