Indi masiguro sang isa ka testigo sang defense team kung ang ginahambalan nga duta sa Island Garden City of Samal amo man ang propedad nga nakabutang sa Statement of Assets, Liabilities and Net Worth ukon SALN ni Vice President Sara Duterte.
Ini ang gin-ako ni Island Garden City of Samal Assessor Engineer John Kenneth Enumerables sa ginpatigayon nga cross-examination ni private prosecutor Atty. Benjamin Tolosa Jr. sa nagapadayon nga impeachment trial.
Gin-kwestyon ni Tolosa ang kalainan sa lokasyon, tuig sang pagbakal, kag presyo sang nasambit nga propedad.
Nakabutang sa titulo nga ang duta yara sa Barangay San Isidro, apang sa 2025 SALN ni Duterte, nakabutang nga ini yara sa Barangay Matanos.
Gin-ako man sang testigo nga ang basehan niya sa pag-angot sang duha ka rekord amo ang pareho nga assessed value kag market value sang propedad. Apang, wala na siya sang iban nga dokumento nga mapakita agud masiguro nga isa lang ang ginatumod nga propedad.
Lain naman ang acquisition cost nga nakabutang sa SALN kag ang presyo sa deed of absolute sale, amo man ang tuig sang pagbakal.
Ginpresentar sang depensa ang testigo agud mapamatud-an nga ang gindeklarar ni Vice President Sara Duterte ang nasambit nga propedad.
Ang mga ginaagawan nga propedad kabahin sang ebidensya sang House of Representatives sa alegasyon nga nagalab-ot sa indi magnubo sa 817.87 million pesos nga undeclared assets kag unexplained wealth sang bise presidente halin 2022 tubtob 2025.
