Nagpasaka sang walo ka articles of impeachment si Republican Congressman Thomas Massie sang Kentucky batok kay United States Defense Secretary Pete Hegseth bangud sa iya ginapatuman nga agresibo nga operasyon militar batok sa Iran.
Gin-akusaran ni Massie si Hegseth nga naglunsyar sang kinagamo nga wala sang pagpahanugot sang US Congress kag nag-abusar sa iya awtoridad bilang hepe ukon head sang Pentagon.
Lakip sa mga alegasyon ang paglapas sa 1973 War Powers Resolution kag ang pagbutang sa peligro sang mga sibilyan paagi sa mga operasyon militar sa Yemen kag Venezuela.
Apang ginpangiwala sang Pentagon ang mga akusasyon kag gintawag si Massie nga disgruntled ukon may pagdumot ukon kasubo nga congressman.
Ginpahayag man ni US President Donald Trump ang iya suporta kay Hegseth kag ginpabutyag nga epektibo ang pagpanguna sini sa mga kampanya militar sang administrasyon.
Samtang, may pila ka Republican lawmakers nga nagapahayag sang posibilidad nga suportahan ang impeachment resolution kaupod sang mga Democrat.
Nadugangan pa ang pagpamangkot sa pagpanguna ni Hegseth kasunod sang midterm election nga naghatag sang kadalag-an sa mga Democrat, samtang nagapadayon ang pagkabalaka sang publiko sa pagsaka sang presyo sang petrolyo nga may kaangtanan sa gyera sa Iran.
Ginalauman nga sugdan ukon umpisahan sang mga mamalidha ang pagboto sa impeachment resolution sa Miyerkules.
