Ginpaathag ni House private prosecutor Atty. Jay Tolosa nga magkalain ang mga detalye sang mga propedad nga ginatalakay sa kasamtangan nga pagdinig kag sang property sa Matina, Davao City nga nangin sentro sang pagpamangkot sang Lunes, Nobyembre 9.
Suno kay Tolosa, base sa transcript of stenographic notes (TSN), may daku nga mga kalainan sa duha ka propedad kag wala man sang kasiguraduhan nga mapamatud-an sang kasamtangan nga testigo nga isa lamang ini ka property.
Dugang pa niya, ang mahimo lamang mapat-od sang testigo amo nga yara sa pareho nga barangay ang duha ka propedad.
Apang, nagsabat gilayon si Atty. Lindon Bacquel sang kampo sang depensa kag ginpangabay sa impeachment court nga ipa-strike off the record ang pahayag ni Tolosa, bangud suno sa iya, daw nagahatag na ini sang testimonya bisan isa lamang siya ka abogado sang prosekusyon.
