Sa baylo nga bola sang basketball ukon football, isa ka dako nga bola sang rubber band ukon lastiko ang nagpangibabaw sa Detroit matapos makarekord bilang pinakamadako sa kalibutan!
Ginhatag ni Claude P. Moore ang sobra 10 ka tuig sa pagtigom kag pagdugang sang rubber bands agud makahimo sang isa ka dako nga bola nga nagabug-at sang 11,578 pounds.
Nagsugod ang iya hilig sa paghimo sang rubber band balls samtang nagahulat siya sa iya mga regular nga appointment sa doktor bangud sang hemophilia, isa ka blood disorder.
Sang 2015, ginhangkat siya sang iya mga katrabaho nga maghimo sang mas dako pa gid nga bersyon sini.
Bangud sa padayon nga pagdamo sang rubber bands, nangin tuman na kadako ang bola kag kinahanglan na ini ibalhin halin sa iya garahe pakadto sa isa ka storage unit. Sang Agosto, gin-gamit pa ang crane agud maalsa kag makilo ang dako nga bola sa Belle Isle.
Personal nga ginmonitor sang Guinness World Records adjudicator ang pagkilo kag ginpamatud-an nga opisyal na ini ang pinakamadako nga rubber band ball sa kalibutan.
Nalab-ot sini ang rekord nga ginauyatan anay ni Joel Waul sang Florida, nga nakahimo sang 9,032-pound nga bola sang 2008.
