Nagpatigayon na sang konsultasyon ang Local Government Unit (LGU) sang Koronadal City kaupod ang mga lokal nga hog raisers agud mapamatian ang ila mga reklamo kag matalakay ang mga isyu nga nagaatubang sa sektor sang pag-atipan sang baboy.
Sa interview sang Bombo Radyo Koronadal kay Koronadal City Mayor Erlinda Araquil, ginpahayag sini nga luwas sa konsultasyon nga ginpatigayon, magatawag pa ang lokal nga panguluhan sang meeting kaupod ang mga nagabaligya sang baboy kag mga hog raisers agud mas mahangpan kag mahibaluan ang kabug-usan nga sitwasyon.
Suno kay Mayor Araquil, importante nga mahibaluan anay kun diin nagahalin ang problema kag kun sin-o nga sektor ang may kaangtanan sini, ilabi na kun yara ini sa bahin sang mga nagabaligya ukon sa mga lokal nga hog raisers.
Paagi sa sini nga mga pagtililipon, ginatinguhaan sang lokal nga panguluhan nga mabatian ang mga nagkalain-lain nga panindugan kag makapangita sang nagakaigo nga solusyon sa mga ginapangatubang nga isyu.
Ginpahayag man sang alkalde nga preparado ang LGU nga magpatuman sang nagakaigo nga legal nga mga tikang agud masiguro ang seguridad kag maproteheran ang interes sang lokal nga hog raisers sa Koronadal City.
