Nagapati si Polomolok hog raiser Amy Jean Jugador nga indi na masarangan sang ₱1,000 nga budget ang kompleto nga handa para sa Noche Buena bangud sa padayon nga pagsaka sang presyo sang mga balaklon kag rekado sa pagluto.
Sa interview sang Bombo Radyo Koronadal ginpahayag ni Jugador, nga ang pagpreparar pa lamang sang spaghetti mahimo na maglab-ot sa ₱500, samtang ang macaroni salad nagakinahanglan sang balor nga ₱1,500 tubtob ₱2,000 kon kompleto ang mga rekado kag indi pagtipiron ang mga kinahanglanon nga sangkap.
Bilang single mother nga nagasagod sa iya mga ginikanan kag isa ka anak, ginaplano niya nga magluto na lamang sang kaugalingon nga baboy para sa ila handa sa Pasko agud indi na magbakal sang karne.
Dugang pa niya, indi dapat tipiron ang pagkaon para sa selebrasyon bangud isa lamang ini ka beses sa isa ka tuig kag importante nga matagamtaman sang pamilya ang pagtililipon, pagpaambit sang pagkaon kag paghimo sang malipayon nga handumanan.
Sa pihak sang nagamahal nga balaklon, nagaplano si Jugador nga magluto sang baboy nga may kabug-aton nga 30 tubtob 35 kilos para sa ila pamilya sa pagsaulog sang Pasko.
