Ginkwestyon ni retired Judge Lorenzo Balo, Provincial Legal Adviser sang Sultan Kudarat, ang kakulang sang detalyado nga pagpaathag sang defense panel ni Vice President Sara Duterte sa katuyuan sang pagpresentar sang tagsa nila ka testigo sa impeachment trial.
Ini matapos nga ginpresentar sa Senate Impeachment Court ang listahan sang mga intended witnesses nga magapamatuod para sa depensa ni Duterte.
Sa interview sang Bombo Radyo Koronadal ginpahayag ni Balo, nga mas maayo kuntani kon ginkumpirma sang defense panel ang espesipiko nga papel kag katuyuan sang kada testigo, agud mahibaluan kon ano nga bahin sang impeachment allegations ang ila sabton ukon pamatud-an.
Ginpaathag man niya nga bisan ginpahayag sang depensa nga ang mga testigo magapamatuod nga wala sang kamatuoran ang mga alegasyon sang complainants kag magsuporta sa ila sabat sa impeachment complaint, masyado ini ka-general ukon pangkabilugan nga pagpaathag.
Para kay Balo, importante nga may separado kag klaro nga purpose ang kada testigo agud maintindihan sang impeachment court kon ano nga ebidensya ukon impormasyon ang ila madala sa trial.
