Nagnubo sang lima ka porsyento ang kabug-usan nga produksyon sang agrikultura kag pangisdaan sa Pilipinas sa ikatlo nga quarter, nga naglab-ot na lamang sa P389.42 bilyon, suno sa datos sang Philippine Statistics Authority ukon PSA.
Gintudlo nga isa sa mga panguna nga rason sang pagnubo amo ang malain nga kondisyon sang panahon, lakip na ang pagbaha bangud sang Habagat kag ang padayon nga pagsaka sang presyo sang abuno kag iban pa nga kinahanglanon sa pagpanguma.
Pinakamabaskog ang pagnubo sa produksyon sang palay, nga nagkubos sang 17.8 porsyento. Samtang, nagrehistro man sang 17.4 porsyento nga pagnubo ang ani sang mais.
Daku ang epekto sini sa sektor sang agrikultura bangud ang palay kag mais importante nga mga produkto para sa suplay sang pagkaon kag pangabuhian sang madamo nga mangunguma sa nagkalain-lain nga bahin sang pungsod.
Nagnubo man sang 8.5 porsyento ang produksyon sa pangisdaan, nga nagapakita sang mga kabudlayan nga ginaatubang sang mga manugpangisda bangud sa nagkalain-lain nga kondisyon sa palibot kag sa industriya.
Sa pihak sini, nagpakita sang pagtubo ang poultry kag livestock sectors bisan pa sa nagapadayon nga paglapta sang mga balatian sa kasapatan.
Bangud sa posibilidad sang dugang nga epekto sang El Niño, nagpreparar ang Department of Agriculture ukon DA sang P62 bilyon nga programa agud buligan kag protektahan ang mga mangunguma kag manugpangisda batok sa epekto sang tuman nga kainit kag hulaw.
Paagi sa amo nga programa, ginatuyo nga mapabaskog ang preparasyon sang sektor sang agrikultura sa pag-atubang sang mga kalamidad kag pagbag-o sang klima nga mahimo magapakunhod pa gid sa produksyon sang pagkaon.
Ginalauman nga paagi sa nagakaigo nga suporta kag preparasyon, mabuligan ang mga mangunguma kag manugpangisda nga mapadayon ang ila pangabuhian kag masiguro ang padayon nga suplay sang mga produkto sa merkado.
