Nagmando ang Senate Impeachment Court sang pagpatuman sang Rule 18 ukon sub judice rule nga pagsulundan—sa tanan nga mga impeachment articles batok kay Bise Presidente Sara Duterte, lakip ang tatlo ka mga articles nga una na nga ginbawi sang prosecution panel.
Sa isa ka desisyon, gindumilian ni Presiding Officer Francis “Chiz” Escudero ang mga senador-judges, ang prosekusyon, ang grupo sang depensa, kag ang ila tagsa ka abogado sa paghimo sang mga komento sa publiko nahanungod sa mga merito sang mga alegasyon samtang nagapadayon ang impeachment trial.
Kasunod ini sang motion nga ginpasaka sang depensa sang Nobyembre 4, nga nagtinguha nga ipabilin ang pagsulundan agud maprotektahan ang integridad sang proceedings kag kinamatarong sang Bise Presidente. Dugang pa nga nagpaandam ang korte nga ang sin-o man nga mapamatud-an nga nagalapas ang magapangatubang sang nagakaigo nga sanctions.
Madumduman nga sang Oktubre 13, ginbawi sang House prosecution panel ang tatlo ka mga impeachment articles nahanungod sa confidential funds, bribery kag grave threats.
Sa karon, ang Article II na lamang ang nabilin—nga may kaangtanan sa ginaalegar wala mapaathag nga manggad ni VP Duterte nga amo man ang nagapabilin nga pending sa impeachment court. Natalana nga magpresentar sang ebidensya ang iya defense team sa Nobyembre 9.
