Nagapabilin nga importante nga haligi sang ekonomiya sang Pilipinas ang mga Overseas Filipino Workers (OFWs), bangud sa ila padayon nga remittances nga nagabulig sa panginahanglan sang mga pamilya kag sa pinansyal nga kahimtangan sang pungsod.
Sa interview sang Bombo Radyo Koronadal ginpahayag ni Gabriel Ortigoza, Bombo International News Correspondent to USA, nga daku ang kontribusyon sang mga Pilipino nga nagapangabudlay sa iban nga pungsod apesar kadam-an sa ila ang ordinaryo lamang nga mga mamumugon.
Dugang ni Ortigoza nga isa sa mga bentaha sang pagtrabaho sa Estados Unidos amo ang mas dako nga kantidad sang kwarta nga mahimo ipadala sa pamilya sa Pilipinas, ilabi na kon maluya ang piso kontra dolyar. Naglab-ot sa USD 35.63 billion ang cash remittances sang mga Pilipino sa abroad sang 2025, suno sa datos sang Bangko Sentral ng Pilipinas (BSP).
Ang nasambit nga mga padala nagasuporta sa pagbayad sang pagkaon, edukasyon, balay kag iban pa nga panguna nga kinahanglanon sang mga pamilya nga nagasalig sa kita sang ila mga himata sa luwas sang pungsod.
Gindugang pa ni Ortigoza, daku ang papel sang mga OFW sa pagpalig-on sang ekonomiya kag mahimo mangin mas mabug-at ang pinansyal nga sitwasyon sang madamo nga pamilya kon wala ang ila suporta.
Ginapakita sini nga indi lamang ang tagsa ka pamilya ang nakabenepisyo sa sakripisyo sang mga OFW, kundi pati ang mas malapad nga ekonomiya sang Pilipinas.
