Ginmanduan sang International Criminal Court ukon ICC si anay Presidente Rodrigo Duterte nga personal nga magtambong sa tanan nga adlaw sang iya hearing sa kaso nga crimes against humanity, nga natalana nga magsugod sa Nobyembre 30, 2026 sa The Hague, Netherlands.
Ginpabutyag ni Presiding Judge Joanna Korner sang ICC Trial Chamber III ang amo nga mando sa ginhiwat nga ikalima kag katapusan nga status conference sang kaso sang Nobyembre 2.//
Ginkumpirmar man ni Peter Haynes, lead defense counsel ni Duterte, nga sundon sang iya kliyente ang mando sang korte kag magatambong mismo sa courtroom sa tion nga magsugod ang pormal nga hearing.
Bisan ginpasugtan sang ICC si Duterte nga indi magtambong sa status conference matapos niya i-waive ang iya kinamatarong nga mag-atubang, ginpabutyag sang korte nga lain ang kinahanglanon sa tion sang actual trial. Gani, obligado ang anay presidente nga personal nga magtambong sa kada adlaw sang hearing sa bug-os nga tion sang hearing.
Samtang, ginpahayag ni Senior Trial Lawyer kag ICC Prosecutor Julian Nicholls nga may yara sang ginabulubanta nga 29 ka testigo halin sa Pilipinas nga magahatag sang ila testimonya paagi sa video ukon audio-visual link.
Bangud sa pito ka oras nga diperensya sang oras sa Pilipinas kag Netherlands, gin-adjust sang korte ang iskedyul sang hearing agud malikawan nga maglapaw sa alas-8 sang gab-i sa Pilipinas ang pagproseso sa mga testigo.
Posible nga magsugod ang hearing alas-8 sang aga sa The Hague, nga katumbas sang alas-3 sang hapon sa Pilipinas. Ginmanduan man sang presiding judge ang prosekusyon nga unahon ang mga saksi nga personal nga magaatubang sa korte antes ang mga magahatag sang testimonya paagi sa video conference.
Lakip man sa ginplano nga logistical arrangements sang korte ang pagsulundan sa paggamit sang courtroom, seating arrangements, kag natalana nga mga tion sang break kag lunch agud masiguro ang organisado nga pagpadalagan sang trial.
Nahibaluan nga ang kaso batok kay Duterte may kaangtanan sa ginapatihan nga mga pagpatay kag malapad nga paglapas sa tawhanon nga kinamatarong sa idalom sang iya administrasyon nga kampanya kontra droga.
Sa Nobyembre 30 natalana nga umpisaon sang prosekusyon ang pagpresentar sang ila mga argumento kag ebidensya bilang kabahin sang makasaysayan nga hearing.
