Nagdeploy ang masobra 50 ka mga layco sang St. Anthony de Padua Parish sa nagkalain-lain nga sementeryo sa Syudad sang Koronadal agud magserbisyo sa publiko nga nagabisita sa ila mga minatay bilang kabahin sang pagdumdom sang All Souls’ Day.
Sa interview sang Bombo Radyo Koronadal kay Nicholas Berlanas, presidente sang mga layco sang St. Anthony de Padua Parish, iya ginpahayag nga nagalakip sa ila grupo ang 13 ka miyembro sang Eternal, 20 halin sa Public kag 30 naman ka Catholic layco nga nagbuligay sa pagserbisyo sa mga pumuluyo.
Ginpangabay man ni Berlanas ang mga paryente nga luyag magpabendisyon sang ila mga lubnganan mahimo lamang magpalapit sa lamesa sang mga layco sa sulod sang sementeryo kag magpahayag sang ila request.
Kaangot sini, ginpaklaros man niya nga donasyon lamang ang ginabaton sang mga layco bilang bulig sa pagmintinar kag pag-atipan sang mga sementeryo.
