Ginapanawagan sang Second Congressional Commission on Education (EDCOM 2) ang Department of Education (DepEd) nga palig-onon ang kurikulum sa early childhood kag primary education matapos madiskubre nga 75 porsyento sang mga Grade 1 pupils ang may kabudlayan sa pagbasa.
Base sa Comprehensive Rapid Literacy Assessment sang DepEd sa pagsugod sang School Year 2026-2027, nag-abot sa 45 porsyento ukon katumbas sang 2.2 milyones ka mga estudyante halin Grade 1 tubtob Grade 3 ang may problema sa reading skills.
Suno sa EDCOM 2, importante nga mapalig-on ang abilidad sang mga kabataan sa pagbasa antes sila makaabot sa Grade 2 kag Grade 3 agud malikawan ang mas daku nga learning gap.
Bangud sini, ginapanawagan sang komisyon ang mas hugot nga pag-angot sang kurikulum halin sa child development centers kag daycare tubtob sa kindergarten kag Grade 1.
Suno sa Republic Act No. 12199 ukon ECCD System Act, responsibilidad man ni Education Secretary Sonny Angara, bilang co-chairperson sang ECCD Council, ang pagdumala sa Early Childhood Care and Development curriculum.
