Nagapabilin nga wala ginagamit ang 15 ka SF-260 training aircraft sang Philippine Air Force (PAF) samtang ginatimbang ang kahimtangan kag kaluwasan sini matapos ang insidente sa kahanginan sa Lipa, Batangas, nga nagresulta sa kamatayon sang apat ka piloto.
Suno kay PAF spokesperson Col. Alvin Jay Capinguian, ginadepensahan sang militar ang paggamit sang amo nga klase sang eroplano batok sa mga kritisismo nga luma na ini. Ginpaathag niya nga ginbakal ang mga aircraft sang 2010 tubtob 2011 kag may pila pa ka tuig nga serbisyo nga mahimo sini mahatag.
Dugang pa ni Capinguian, ang operational capability sang isa ka eroplano wala lamang ginabase sa edad sini, kundi sa kadamuon sang operating hours, rekord sang paggamit kag sa kabug-usan nga kahimtangan sang aircraft.
Apang, bangud sang nagluntad nga aksidente, ginapabilin anay nga grounded ang 15 ka iban pa nga SF-260 aircraft samtang ginahatagan sang pagtalupangod ang mga isyu parte sa kaluwasan kag operasyon sini.
Madumduman nga apat ka piloto ang napatay matapos nagbungguanay sa kahanginan ang duha ka eroplano sa Lipa, Batangas. Ang insidente nagbukas sang diskusyon parte sa edad, pagmintinar kag kaluwasan sang mga training aircraft nga ginagamit sa pagbansay sang mga piloto sang PAF.
Sa pihak sang depensa sang militar, ginapakita sang insidente ang importansya sang regular nga inspeksyon, nagakaigo nga pagmintinar kag hugot nga pagsunod sa mga protocol sa kaluwasan agod malikawan ang posible nga mga aksidente sa palaabuton.
