Liwat nga ginpanawagan sang Barangay Morales, Koronadal City, ang pagpadaku sang San Felipe Dam paagi sa mga resolusyon nga ila pila na ka beses nga ginpasa agud mapauswag ang kapasidad sini sa pagpaawas sang tubig.
Sa interview sang Bombo Radyo Koronadal, ginpahayag ni Barangay Kagawad Hans Avance, limitado ang mga buho sang dam kag duha lamang ang ginabuksan bangud nagatipon ang mga debris sa tunga sang buho.
Apang, wala sang hurisdiksyon ang barangay sa pasilidad bangud sakop ini sang National Irrigation Administration ukon NIA.
Ini matapos mag-overflow ang dam kag magbaha sa Masagana B, Tolentino, Boundary kag Alegria.
Nag-abot sa 20 ka indibidwal ang nag-evacuate matapos masulod sang tubig ang mga panimalay kag boarding house, nga nag-abot sa hawak ang lebel sa pila ka lugar.
Padayon man ang rescue operations, lakip ang pagluwas sa isa ka pamilya nga may madamo nga kabataan sa Tolentino nga temporaryo nga ginpatiner sa barangay hall.
Sa karon, ginapabilin anay sa evacuation center ang mga apektado samtang ginahatagan sila sang pagkaon kag iban nga kinahanglanon.
Ginaprioridad man ang disinfection, ilabi na sa mga kabataan nga nakatusmaw sa tubig-baha.
Ginpanawagan ni Avance ang mga residente nga i-report ang mga naguba nga panimalay agud madokumentuhan kag mangin basehan sa paghatag sang ayuda halin sa syudad kag probinsya.
