Nagapanawagan ang isa ka cemetery goer sa publiko nga mangin responsable sa paghaboy sang basura kag magbuligay sa pagmintinar sang kalimpyo sa mga sementeryo sa pagsaulog sang todos lo santos 2026.
Sa interview sang Bombo Radyo Koronadal, ginpahayag ni Mildred Deloso-Dedel nga importante nga ibutang sa nagakaigo nga basurahan ang mga basura sa baylo nga bayaan ini sa palibot sang mga lulubngan.
Suno sa iya, mas maayo man nga aga magbisita sa sementeryo agud malikawan ang madamo nga tawo kag mangin matawhay ang pag-ampo para sa mga pinalangga nga napatay.
Ginpahayag ni Dedel nga medyo matawhay pa ang sitwasyon sa Catholic Cemetery sa Koronadal City sang aga sang Nobyembre 1, bangud temprano sila nagbisita sa lulubngan sang ila amay.
Nag-gasto man ang ila pamilya sang kapin P500 para sa pagpanglimpyo sang lulubngan sang ila tatay nga napatay sang 2011 bangud sa balatian sa tagipusuon. Ginpahanumdom niya ang mga cemetery goers nga magdala lamang sang nagakaigo nga mga butang kag magbulig sa pagmintinar sang kahapsay kag kalimpyo sang sementeryo.
Samtang, ginpaambit man ni Dedel ang iya mga handumanan sa iya amay nga iya ginlaragway bilang maayo nga amay kag respetado nga miyembro sang ila komunidad sa Barangay Morales.
