Ginalauman ang pagpatuman sang dugang-bawas sa presyo sang mga produktong petrolyo sa pagsugod sang bulan sang Nobyembre, suno sa inisyal nga pagbulubanta sang Department of Energy (DOE).
Base sa ginpagwa nga price outlook sang ahensya, posible nga magnubo sang P0.80 tubtob P1.00 kada litro ang presyo sang diesel.
Ini ang mangin kahigayunan para sa mga motorista nga nagasalig sa diesel-powered nga mga salakyan nga makagasto sang mas manubo sa ila pagpakarga sang gasolina.
Sa pihak nga bahin, ginapaabot naman ang pagsaka sang presyo sang gasolina sa balor nga P2.00 tubtob P2.20 kada litro. Samtang wala naman ginapaabot nga pagbag-o sa presyo sang kerosene sa amo man nga semana.
Apang, ginapaathag nga mga inisyal pa lamang ini nga pagtaya kag mahimo pa nga magbag-o depende sa nagapadayon nga pag-usisa sa presyo sang petrolyo sa international market kag iban pa nga factors nga nagaapekto sa presyo sini.
Opisyal nga ipahibalo ang pinal nga price adjustment sa Lunes, Nobyembre 2, agud mahibaluan sang publiko ang eksakto nga kantidad sang dugang ukon bawas sa kada litro sang mga produktong petrolyo.
Samtang, kasagaran nga ginapatuman sang mga kumpanya sang langis ang bag-o nga presyo kada Martes sang aga, nga direkta nga nagaapekto sa adlaw-adlaw nga gastuhon sang mga motorista kag mga nagabiyahe.
