Ginpahayag ni Ret. Police LtCol. Barney Condes, RN, Jail Warden sang South Cotabato Rehabilitation and Detention Center, nga yara sa maayo nga kahimtangan ang provincial jail, lakip ang mga pasilidad sa sulod sini, agud maatubang ang posible nga epekto sang mabaskog nga El Niño.
Sa interview sang Bombo Radyo Koronadal, ginpahayag ni Condes nga mas maayo na ang sitwasyon sang pasilidad sa idalom sang iya pagpamuno kumpara sang una pa siya nangin jail warden.
Suno kay Condes, may mga Persons Deprived of Liberty (PDL) nga nagahimo sang mga sitwasyon nga mahimo makaapekto sa iya pagpamuno, apang wala ini nangin rason agud untaton niya ang pagpatuman sang disiplina kag pagpaayo sang pagdumala sa pasilidad.
Dugang pa niya, ginbag-o niya ang mga patakaran nga iya nakita nga indi nagakaigo sang una, nga suno sa iya nakabulig agud mangin mas disiplinado ang mga PDL sa sulod sang provincial jail.
Isa naman sa ginapabugal ni Condes amo ang pagkabaton sang pasilidad sang ISO 9001:2015 Quality Management System certification, nga nagapakita sang ila pagsunod sa mga standard sa pagdumala sang kalidad sang mga proseso kag serbisyo.
Ginpabutyag niya nga padayon ang pagpaayo sang mga sistema kag pasilidad agud mapabilin ang hapsay nga pagdumala sang provincial jail.
