Daw indi lang basta kusog ang kinahanglan kundi pati bakal nga pangil! Isa ka circus performer halin sa United States ang nakapahimo sang talalupangdon nga rekord matapos niya nga mabitbit ang tatlo ka tawo gamit lamang ang iya mga ngipon samtang nagabitay.
Nagpakita sang iya indi ordinaryo nga talento sa atubangan sang live audience sa Songshan District, Taipei City, Taiwan si Michael Radiff sang Mayo.
Nahimo niya nga alsahon ang kabug-usan nga 185.80 ka kilo kag nakuha ang Guinness World Records title nga “heaviest weight held with the teeth while suspended upside down.”
Sa iya performance, nakabitay si Radiff samtang ginkagat ang mouthguard nga konektado sa strap kag metal bar.
Ang mas makatilingala, tatlo niya ka upod ang iya gin-alsa nga daw wala lang, bisan ang iya mga ngipon kag panga amo lamang ang nagasuporta sa ila kabug-aton.
Bangud indi ini basta-basta nga stunt, nag-agi si Radiff sa mabudlay nga training agud mapabakod ang iya panga, liog kag lawas.
Suno sa Guinness World Records, kinahanglan nga maalsa ang kabug-aton sing labing menos 15 sentimetro halin sa duta kag mapabilin ini sa sulod sang 10 segundos agud mangin balido ang rekord.
Mas kahibudlayan pa, nalab-ot niya ang bag-o nga rekord nga 185.80 ka kilo, nga naglapaw sa nagligad nga 130 ka kilo nga rekord ni Loretta Antal sang Hungary sang Enero 27, 2024.
Sa sini nga pasundayag, napamatud-an ni Radiff nga indi lang ginagamit pag-yuhom ang mahimo sang iya mga ngipon, masarangalan man gali sini mag-alsa sang tatlo ka tawo!
