Wala pa gihapon matun-an ang nahamtangan ni Senador Ronald “Bato” dela Rosa bisan nagtapos na ang isa ka semana nga palugit nga ginhatag sang Philippine National Police (PNP) agud boluntaryo nga magtugyan sa mga otoridad.
Kaangot sini, nagtakop na ang ultimatum sang Biyernes, Oktubre 30, matapos ini ginpatuman sang PNP sugod Oktubre 23.
Antes sini, ginpahayag man ni Department of the Interior and Local Government (DILG) Secretary Jonvic Remulla ang paghatag sang 50 milyones pesos nga reward sa bisan sin-o nga makahatag sang impormasyon nga makabulig sa pagtukib sa nahamtangan sang senador.
Apang, sa pihak sang nasambit nga ultimatom kag padya, wala pa gihapon nadakpan ukon nakita si Dela Rosa.
Samtang, ginpahayag naman ni Atty. Israelito Torreon, legal counsel sang senador, nga may yara sang gamhanan nga protector ang iya kliyente.
Ginpaathag niya nga indi tawo ang iya ginatumod kundi ang Dios, bangud dako ang pagtuo kag madasigon sa pagpangamuyo sang senador.
Sa pihak sini, ginahulat pa ang desisyon sang Korte Suprema sa petisyon ni Dela Rosa nga nagapangayo nga pugngan ang implementasyon sang arrest warrant nga ginpagwa sang International Criminal Court (ICC).
