Masobra sa 200 ka mga driver kag konduktor sang mga bus kag van sa bug-os nga Region XII ang ipaidalom sa drug testing sa idalom sang Oplan Harabas sang Philippine Drug Enforcement Agency (PDEA) Region XII, bilang kabahin sang kampanya nga nagatinguha nga masiguro ang kaluwasan sang mga pasahero sa ila pagbyahe.
Sa interview sang Bombo Radyo Koronadal kay Asnawi Salik, Assistant Regional Director sang PDEA XII, ginpahayag sini nga mandatory ukon kinahanglanon ang drug testing para sa mga driver kag operator sang mga bus kag van agud mapamatud-an nga wala sila nagagamit sang ilegal nga droga samtang nagaserbisyo sa publiko.
Suno kay Salik, ang mga driver nga magdumili nga magpaidalom sa drug testing mahimo nga mahamtang sa kaangay nga mga penalidad, lakip ang posible nga pagsuspinde sang ila lisensya kag indi pagtugot nga makabiyahe, suno sa nagapatuman nga mga regulasyon.
Bangud sini, ginpanawagan ni Salik ang padayon nga suporta sang publiko sa kampanya sang PDEA XII kontra sa ilegal nga droga, ilabi na sa mga programa nga nagatinguha nga maprotektahan ang mga pasahero kag masiguro ang mas luwas nga transportasyon sa rehiyon.
