Ginkumpirmar ni hog raiser Manong Panoy nga nagpatigayon na sang miting si Koronadal City Mayor Erlinda “Bing” Pabi-Araquil kaupod ang mga lokal nga magbababoy agud talakayon ang padayon nga pagnubo sang presyo sang buhi nga baboy kag ang mga problema nga ila gin-atubang sa ila pangabuhian.
Sa interview sang Bombo Radyo Koronadal kay Manong Panoy, isa ka lokal hog raiser, ginapaabot man nga magpatigayon liwat sang masunod nga miting ang alkalde agud mahisgutan ang posible nga mga solusyon kag mas mahangpan ang nagkalain-lain nga kabudlayan sang mga hog raiser sa syudad.
Samtang, nagapanawagan si Manong Panoy sa lokal kag provincial nga gobyerno, ilabi na kay South Cotabato Governor Reynaldo Tamayo Jr., nga maghatag sang dugang nga suporta sa mga lokal nga hog raiser.
Ginhangyo man niya ang gobyerno nga ikonsiderar ang pagpahunong ukon paglimit sang pag-angkat sang karne sang baboy halin sa iban nga pungsod, agud mabuligan nga maprotektahan ang lokal nga industriya kag ang pangabuhian sang mga magbababoy.
Dugang pa ni Manong Panoy, dako ang pagsalig sang mga hog raiser sa ila kita sa pag-aalaga sang baboy agud masuportahan ang pagpaeskwela sang ila mga kabataan kag ang adlaw-adlaw nga kinahanglanon sang ila pamilya, gani nagalaum sila nga may nagakaigo nga tikang nga himuon ang gobyerno para sa kaayuhan sang lokal nga sektor sang pagpamababoy.
