Nagpanawagan ang isa ka traysikol driver sa syudad sang Koronadal nga unahon sang gobyerno ang pagsolbar sa nagkalain-lain nga problema sang pungsod, sa baylo nga maggasto sang dako nga pondo para sa pag-arestar kay Senador Ronald “Bato” dela Rosa.
Sa interview sang Bombo Radyo Koronadal kay Manong Toto, ginpahayag niya nga mas maayo kuntani nga ang P50 milyon nga balor sang tanyag para sa pagkaarestar sang senador igahin na lang sa mga programa nga makabulig sa pag-atubang sang posible nga epekto sang Super El Niño.
Ginpabutyag man niya ang iya kabalaka sa padayon nga pagsaka sang presyo sang mga nagapanguna nga baraklon kag mga produktong petrolyo, nga nagadugang sa kabudlayan sang pangabuhi sang ordinaryo nga mga Pilipino.
Suno kay Manong Toto, kinahanglan nga mas tutukan sang gobyerno ang mga problema nga direkta nga nagaapekto sa pang-adlaw-adlaw nga pangabuhi sang pumuluyo, ilabi na ang mga manugpangabudlay kasubong sa iya.
Gani, ginpangabay niya sa mga lider sang pungsod nga maghimo sang gilayon kag epektibo nga aksyon sa mga nagapadayon nga isyu, kag likawan ang mga tikang nga iya ginakabig nga may kaangtanan sa pulitika.
