Ginpasiguro sang Department of Trade and Industry (DTI) nga magapabilin nga wala sang pagsaka ang presyo sang nagkalain-lain nga batakan nga baraklon tubtob Disyembre 31, suno sa mga manufacturer.
Suno kay DTI Secretary Cristina Roque, nagpasalig ang mga manufacturer nga tipigan nga estable ang presyo sang ila mga produkto bisan pa sa pagsaka sang presyo sang gatong kag mga hilaw nga materyales nga ginagamit sa produksyon.
Lakip sa mga baraklon nga sakop sang ini nga pasalig ang sardinas, gatas, kape, noodles, asin, sabon, sabo nga panglaba, kag pila ka mga lamas nga ginagamit sa pagluto.
Dugang pa sang kalihim, wala sang rason nga magkabalaka ang publiko parte sa suplay sang mga batakan nga baraklon, bangud may yara sang nagakaigo nga suplay sa merkado.
Gani, ginpangabay niya ang mga konsumidor nga indi magpatigayon sang sobra nga pagbakal ukon pagtipig sang mga produkto, agud malikawan ang kakulangon sang suplay kag mapabilin ang hapsay nga distribusyon sang mga kinahanglanon sang publiko.
