Padayon nga ginabantayan sang Philippine Drug Enforcement Agency (PDEA) Region 12 ang paglapta sang illegal nga droga sa rehiyon, nga ginakabig gihapon nga drug-consuming region bangud sa kadamuon sang droga nga nagasulod sa lugar, lakip ang supply nga nagahalin sa kaingod nga Bangsamoro Autonomous Region in Muslim Mindanao (BARMM).
Suno kay PDEA-12 Assistant Regional Director Asnawi Salik, sa interview sang Bombo Radyo Koronadal, ginabanta nga 70 tubtob 80 porsyento sang droga nga nagalibot sa Soccsksargen ang nagahalin sa BARMM.
Samtang, ginahibalo pa sang mga otoridad ang posibilidad nga may dugang nga supply sang droga nga makasulod sa rehiyon kasunod sang pagkumpiskar sang 521 ka kilo sang shabu sa Laos, nga ginakonektar sa transnational drug syndicate nga Sam Gor. Suno sa nauna nga impormasyon nga ginpaambit ni Salik, isa ka opisyal sang BARMM ang ginatudlo nga posible nga financier sang nasambit nga operasyon.
Apang, ginsalig na sang PDEA-12 sa PDEA-BARMM ang pag-usisa sa nasambit nga kaso.
Samtang, bilang bahin sang padayon nga kampanya kontra illegal nga droga, apat ka persona nga ginakabig nga high-value targets ang nadakpan sa entrapment operation sa Barangay Rizal Poblacion, Banga, South Cotabato.
Ginkumpirmar ini ni Salik, nga nagpaathag nga natigayon ang operasyon paagi sa pagtinambayayong sang mga operatiba sang PDEA-12 kag mga pulis halin sa nagkalain-lain nga yunit sang Police Regional Office 12.
Naaresto ang apat matapos nga gin-alegar nga nagbaligya sang shabu sa mga undercover agent. Suno kay Salik, ginpasakaan na ang mga ini sang kaso bangud sa paglapas sa Comprehensive Dangerous Drugs Act of 2002.
Dugang pa niya, nagapadayon ang surveillance sang mga otoridad sa iban pa nga mga persona nga posible may kaangtanan sa illegal nga droga agud madakpan kag mapanabat sa idalom sang layi.
Bisan may mga barangay na nga nadeklarar nga drug-free sa nagkalain-lain nga bahin sang Rehiyon 12, nagapabilin gihapon ang presensya sang mga persona nga ginapatihan nga nalambigit sa illegal nga baligyaanay sang droga.
Samtang, ginpasiguro man ni Salik nga wala na sang nagakatabo nga drug recycling sa ila mga operasyon bangud gilayon nga ginaguba ang mga nakumpiskar nga illegal nga droga kag ginapakita sa publiko ang proseso bilang bahin sang transparency kag pagpanabat sang ahensya.
