Nagapati ang House prosecution panel nga daku nga hagit para sa kampo ni Vice President Sara Duterte ang pagpanginwala sa mga ebidensya nga ila ginpresentar may kaangtanan sa nabilin nga artikulo sang impeachment, nga nagatalakay sa gin-alegar nga indi mapatin-aw nga manggad sang bise presidente.
Suno kay prosecution spokesperson Ace Barbers sang Sabado, mabakod ang ila mga ebidensya, lakip ang Statement of Assets, Liabilities and Net Worth ukon SALN, nga naghalin sa mga ahensya sang gobyerno kag indi basta-basta mahimo nga pekeon ukon manipulahon.
Ginpahayag ni Barbers ang iya kumpiyansa nga makakuha sila sang conviction ukon paghukom nga may sala, bangud nagapati sila nga nagasuporta ang ila mga dokumento sa mga alegasyon batok sa bise presidente.
Dugang pa niya, kon legal ang pagkuha sa mga nasambit nga dokumento, mangin daku nga hagit para sa depensa ang pagkuwestyon ukon pagpanginwala sa mga ini.
