Nagpanawagan ang Senate minority sa gobyerno nga makigdayalogo kay Senator Ronald “Bato” Dela Rosa kag siguruhon ang pagsunod sa due process sa pagpatuman sang arrest warrant sang International Criminal Court (ICC) batok sa senador, agud malikawan ang posible nga komprontasyon nga mahimo magresulta sa kamatayon sang mga Pilipino.
Ginpahayag sang minority nga handa sila nga magbulig sa pagpatunga sang pag-istoryahanay sa tunga sang kampo ni Dela Rosa kag sang gobyerno, agud makabuo sang legal nga proseso nga magahatag sa senador sang oportunidad nga sabton ang mga alegasyon batok sa iya.
Gin-agda man nila ang mga opisyal sang ehekutibo, mga otoridad sa pagpatuman sang kasuguan, si Dela Rosa kag ang iya pamilya kag mga abogado, pati na ang iya mga supporter, nga magpabilin nga kalmado kag bukas sa komunikasyon.
Ginkalipay man sang Senate minority ang panindugan ni Interior Secretary Jonvic Remulla nga mas pilion ang negosasyon sangsa operasyon nga mahimo magresulta sa pagkasamad ukon pagkapatay sang mga tawo.
“Wala sing Pilipino nga dapat mapatay para lamang mapamatud-an sang bisan sin-o ang iya punto,” suno sa grupo.
Samtang, ginpahayag sang minority nga ginpabutyag na ni Dela Rosa sa publiko ang iya kahanda nga atubangon sa mga korte sa Pilipinas ang mga alegasyon kag kaso batok sa iya. Nanawagan man ang senador sa iya mga supporter nga maghatag sang suporta sa malinong nga paagi.
Suno sa minority, dapat konsiderahon sang gobyerno ang kahanda ni Dela Rosa bilang basihan sa pagdayalogo, samtang ginaseguro ang patas nga proseso kag ang bug-os nga oportunidad para sa senador nga depensahan ang iya kaugalingon.
