Ginbawian sang kabuhi ang isa ka pari sa Ecuador sang Sabado matapos mahulugan sang dako nga krus samtang nagamisa paagi sa livestream, suno sa mga opisyal sang simbahan.
Ginkumpirmar sang Archdiocese of Guayaquil ang pagkapatay ni Rev. Patricio Alfredo Sánchez Molinari, nga nagaserbisyo bilang kura paroko sa Church of Perpetual Relief sang Central Vicariate.
Base sa video sang insidente, gulpi nga natumba paatubang ang dako nga krus nga nakabitay sa dingding sa likod ni Molinari kag nahulog sa iya ulo. Natabo ini samtang nagatindog siya sa likod sang altar kag nagaatubang sa mga parokyano, gani wala niya makita ang nagakahulog nga krus.
Wala na nakatindog liwat ang pari matapos ang insidente. Mabatian sa video ang pagsinggit kag paghibi sang mga tawo sa sulod sang simbahan, samtang ang pila sa ila nagdali sa pagbulig sa iya.
Ginpahayag sang Archdiocese of Guayaquil sa ila pahayag nga si Molinari “nagpauli na sa Balay sang Amay agud magkalipay sa Iya presensya kag himaya.”
Samtang, gin-iskedyul ang isa ka Misa para sa pagdumdom kag pagpasidungog sa pari sang Domingo sang gab-i.
