Nagpatigayon sang protesta ang libo-libong estudyante sa Indonesia agud pangayuan sang mas epektibo nga aksyon ang gobyerno batok sa nagalala nga polusyon sa hangin ukon haze nga nagapadayon sa pungsod kag sa pila ka bahin sang Southeast Asia.
Masobra 500 ka mga indibdiwal ang nagtipon sa guwa sang Central Kalimantan Governor’s Office sa Palangka Raya agud ipabutyag ang ila pagkadismaya sa sabat sang mga opisyal sa problema sang madamol nga aso nga nagaluntad halin pa sang Agosto.
Ginpanawagan man sang mga nagaprotesta kay Indonesian President Prabowo Subianto nga magdeklara sang national emergency kag magpatuman sang mas estrikto nga mga tikang agud mapunggan ang mga sunog sa kagulangan, nga ginatudlo nga may kaangtanan sa pila ka pamaagi sa agrikultura.
Naglapta ang mga sunog sa nagkalain-lain nga bahin sang Indonesia, lakip na sa isla sang Borneo.
Mas tuman man suno pa ang sitwasyon sini nga tuig kun ikumparar sa nagligad nga dekada.
Nakaapekto man sa ikaayong lawas sang publiko ang madamol nga aso, bangud masobra 333,470 ka residente sa pito ka probinsya ang nag-antos sang acute respiratory illnesses, suno sa Ministry of Health sang Indonesia.
Samtang, naglapta man ang epekto sang haze sa mga kaingod nga pungsod, lakip ang Singapore kag Malaysia, nga nakaeksperyensya man sang pagnubo sang kalidad sang hangin.
