Nagapangatubang sang pagnubo sang kita kag dugang nga kabudlayan sa pang-adlaw-adlaw nga pangabuhi ang mga fruit vendor sa Gensan Drive, syudad sang Koronadal, matapos ang pagbalhin sang ila puwesto sa bag-o nga lugar malapit sa isa ka Gasoline Station.
Sa interview sang Bombo Radyo Koronadal, ginpahayag ni Jiji Deloso, isa ka fruit vendor nga halos 30 na ka tuig nga nagabaligya sang prutas sa syudad, nga daku ang epekto sang pagbalhin sa ila baligya.
Suno kay Deloso, nga sa duha ka adlaw nga ila pagsaylo gatos ka pesos lamang ang ila collection, nga kulang sa pagtabon sang adlaw-adlaw nga galastuhan kag iban pa nga obligasyon.
Dugang ni Deloso, nga ginakabalak-an man nila ang kakulang sang suga sa ila bag-o nga puwesto sa una nga adlaw sang ila pagbalhin, nga nagadugang sa kabudlayan samtang nagahulat sang mga nagapamakal.
Ginpahayag man ni Deloso nga ginapaninguhaan nila nga mapabilin nga matinlo ang palibot kag ginadala nila ang ila basura pagkatapos magbaligya.
Bangud sini, nagapanawagan ang mga vendor sa lokal nga panguluhan sang Koronadal City nga hatagan sila sang konsiderasyon kag bulig agud mapauswag ang ila kahimtangan sa pangabuhi.
Samtang, gin-agda ni Deloso ang ila mga suki kag regular nga customer nga padayon sila nga suportahan sa ila bag-o nga puwesto, samtang nagalaum sila nga mabatian sang LGU ang ila panawagan.
