Ginpaathag sang National Commission on Indigenous Peoples (NCIP) Region XII nga wala sang kaangtanan ang ahensya sa ritwal nga nagresulta sa kamatayon sang duha ka mangunguma sa Barangay Datal Anggas, Alabel, Sarangani Province, kasunod sang nagalapta nga sala nga impormasyon sa social media nga ang ahensya amo ang nag-aprubar ukon nag-sanction sang nasambit nga ritwal.
Sa interview sang Bombo Radyo Koronadal, ginpahayag ni NCIP XII OIC Regional Director Ricky Tesero nga ang pamilya mismo sang duha ka napatay nga mangunguma ang nagkadto sa ila talatapan agud ipatin-aw nga indi matuod ang nagalapta nga impormasyon.
Suno kay Tesero, sa idalom sang Indigenous Peoples’ Rights Act of 1997 ukon Republic Act No. 8371, ginakilala ang kinamatarong sang mga Indigenous Peoples (IPs) sa pagpatuman sang ila kaugalingon nga customary laws, tradisyon kag kultura. Apang, ginpahanumdom niya nga kinahanglan gihapon nga sundon ang nagakaigo nga proseso kag unahon ang kaluwasan sang mga miyembro sang komunidad sa pagpatigayon sang mga ritwal.
Gin-insister man ni Atty. Ybañez nga ginatahod sang NCIP XII ang customary laws, tradisyon kag kultura sang tagsa ka Indigenous Peoples, apang kinahanglan masiguro nga wala sang kabuhi nga madula ukon miyembro sang tribu nga mabutang sa peligro sa tion sang mga ritwal, kasubong sang sulif ukon salom.
Ginpaklaro sang abogado nga bisan ginakilala kag ginatahod sang ahensya ang mga kinaandan sang mga IPs, importante gihapon nga maproteheran ang kabuhi kag kaluwasan sang tagsa ka tawo.
May kaangtanan diri, nagapatigayon ang NCIP XII sang information and education campaign agud mapalapnag ang kaalam sang mga IPs parte sa ila mga kinamatarong, customary laws kag importansya sang pagsunod sa nagakaigo nga proseso sa pagpatuman sang ila mga tradisyon.
Nanawagan man si Atty. Ybañez sa publiko, ilabi na sa mga IPs, nga indi mag-alang sa pagkonsulta sa ila talatapan kon may mga pamangkot, kabalaka ukon legal nga problema nga nagaatubang sa ila komunidad.
Dugang pa sang abogado, bukas ang talatapan sang NCIP XII sa pagbaton sang mga pamangkot kag nagahatag man ini sang libre nga legal advice sa mga IPs agud mabuligan sila nga mahangpan ang ila mga kinamatarong kag maatubang ang mga problema sa legal kag nagakaigo nga paagi.
Paagi sa padayon nga information campaign kag paghatag sang legal nga bulig, ginatuyo sang NCIP XII nga mapalig-on ang kaalam sang mga IPs sa pagpanalipod sang ila kultura kag tradisyon, samtang ginapasiguro man ang kaluwasan kag kaayuhan sang tagsa ka miyembro sang ila komunidad.
Samtang, ginpahanumdom sang ahensya ang publiko nga mangin responsable sa pagpaambit sang impormasyon kag magpangita sang nagakaigo nga kumpirmasyon agud malikawan ang paglapta sang sala nga balita.
