Duha ka pulis kag duha ka sibilyan ang pilason kasunod sang paglupok sang ginapatihan explosive device sa isa ka building sa Athens, Greece, sang Miyerkules.
Suno sa Greek police, nagresponde ang mga otoridad matapos makabaton sang report halin sa isa ka residente kag sa building manager angut sa isa ka makaduluda nga backpack, nga ginapatihan may unod nga ilegal nga droga.
Samtang gina-usisa sang mga pulis ang bag, hinali lang ini nga naglupok. Nagpahayag ang isa ka opisyal sang pulis nga ang device mahimo nga ginpalupok sa malayo.
Lakip sa mga napilasan ang building manager, kag gilayon nga gindala sa balay balungan ang tanan nga apat ka biktima. Narekober man sang mga otoridad ang mga shrapnel ukon bomb fragments sang explosive devie sa lugar.
Sa karon wala ginakabig sang kapulisan nga may kaangtanan sa terorismo ang insidente.
Padayon naman ang imbestigasyon sang homicide unit sa nasambit nga kaso agud mahibaluan ang ginhalinan sang explosive device kag matumod ang mga responsable sa pagsigabong.
