Ginapreparar sang lokal nga panguluhan sang Tampakan, South Cotabato, ang Local El Niño Response Team agud mapabakod ang preparasyon sang mga mangunguma kag sang komunidad sa posible nga epekto sang Super El Niño.
Suno kay Tampakan Mayor Leonard Escobillo, nagahanda ang munisipyo sang mga tikang agud maatubang ang posible nga malawig nga tig-ilinit, ilabi na ang epekto sini sa sektor sang agrikultura kag pangabuhian sang mga pumuluyo.
Kabahin sa ginatutukan ang paghatag sang edukasyon kag impormasyon sa mga mangunguma parte sa epekto sang El Niño sa ila mga pananom, husto nga paggamit sang tubig, kag mga tikang nga mahimo himuon agud maminusan ang posible nga pagkalugi sa pagpanguma.
Ginatutukan man sang lokal nga panguluhan ang posible nga kakulang sang tubig kag kuryente nga mahimo makaapekto sa produksyon sang mga pananom kag pag-atipan sang mga kasapatan.
Kabahin man sa preparasyon ang pagpaathag sa publiko parte sa mga peligro sa panglawas kag kaluwasan nga mahimo resulta sang malawig nga tig-ilinit.
Paagi sa temprano nga pagpreparar kag pagpalapnag sang impormasyon, ginatuyo sang Tampakan LGU nga mabuligan ang mga mangunguma nga maatubang ang mga hangkat sang Super El Niño kag maproteheran ang ila pangabuhian.
