Nakadakop na ang Koronadal City Environment and Natural Resources Office (CENRO) sang lima ka indibidwal nga nagapanigarilyo kag naga-vape sa mga pickleball court sa syudad.
Sa interview sang Bombo Radyo Koronadal, ginpahayag ni Enforcement Division, Koronadal City ENRO Head Carmella Dawn Dumaup nga padayon ang pagmonitor sang ila talatapan sa mga pickleball court agud matalupangdan ang mga nagalapas sa regulasyon batok sa pagsigarilyo kag pag-vape sa mga pampubliko nga lugar.
Gin-athag nga ang lima ka indibidwal ang nadakpan sa amo nga paglapas, apang wala ginpahayag nga gin-isyuhan na sila sang ticket ukon ginmultahan.
Samtang, ginpaathag sang CENRO nga mahimo makabig nga pampubliko nga lugar ang isa ka pickleball court bisan pribado ang pagpanag-iya sini, kon bukas ini sa publiko kag nagabaton sang bayad para sa paggamit sang pasilidad. Apang, kon pamilya lamang ang nagagamit sang lugar kag wala ini ginabuksan sa publiko, mahimo ini magpabilin nga pribado nga propiedad.
Bangud sini, padayon ang panawagan sang CENRO sa publiko nga tumanon ang mga regulasyon batok sa pagsigarilyo kag pag-vape sa mga lugar nga bukas sa publiko agud malikawan ang paglapas sa mga nagapatuman nga pagsulundan.
