Ginawhag ni House prosecution panel adviser kag spokesperson Ace Barbers ang mga opisyal sang national security nga usisaon kun gina-take advantage sang China ang mga pagbahin-bahinay sa politika sa Pilipinas, samtang nagapadayon ang impeachment trial batok kay Bise Presidente Sara Duterte kag ang tensyon sa West Philippine Sea (WPS).
Suno kay Barbers, kinahanglan mahibaluan kun conincidence lang ang tiyempo sang mga hilikuton sang China sa kadagatan ukon kabahin ini sang mas malapad nga estratehiya agud pahinayon ang paghilusa sang mga Pilipino.
Apang gin-athag sang anay mamalidha nga indi igo nga pamatuod ang pagdungan sang mga hitabo agud masiling nga may kaangtanan ang mga ini.
Ginpabug-atan niya nga dapat ibase sa masaligan nga intelligence information kag napamatud-an nga mga ebidensiya ang bisan ano nga imbestigasyon.
Nagpaandam man si Barbers nga mahimo ma-take advanatage sang China ang mainit nga diskusyon sa lokal nga politika agud maliso ang atensyon sang publiko palayo sa mga isyu sa West Philippine Sea.
Dugang pa niya, ang impeachment trial isa ka proseso nga ginatugutan sang Konstitusyon, gani indi dapat tugutan nga mapakinabangan ini sang iban nga pungsod para sa ila kaugalingon nga interes.
Nagpanawagan man si Barbers sa mga Pilipino, bisan ano pa ang ila ginauyunan nga panig sa politika, nga magpabilin nga mabinantayon sa posible nga pagpanghilabot sang mga langyaw kag maghiliusa sa pagpanalipod sang soberanya kag nasyonal nga interes sang Pilipinas.
