Target sang House prosecution panel nga isumiter antes sang deadline sa Oktubre 23 ang pormal nga offer sang ebidensiya batok kay Bise Presidente Sara Duterte agud mapadasig ang nabilin nga proseso sang impeachment trial sa Senado.
Suno kay House prosecutor Joel Chua, ginapreparar na sang panel ang mga dokumento kag iban pa nga ebidensiya nga luyag nila nga batonon kag konsiderahon sang impeachment court.
Nahibaluan nga may 10 ka adlaw ang kampo sang depensa halin sa pagbaton sini agud magsumiter sang ila komento kag mga pag-object.
Sa testimonya ni forensic accounting expert Atty. Alexander Cabrera, ginabanta nga nagalab-ot sa P817.87 milyon ang ginapatihan nga indi mapaathag nga manggad nga naangot kay VP Sara kag sa iya bana nga si Atty. Manases “Mans” Carpio, halin 2022 tubtob 2025. Suno sa eksperto, mahimo pa ini maglab-ot sa P1.5 bilyon depende sa pamaagi sang pagkukwenta.
Ginbase ni Cabrera ang iya pagsusisa sa mga rekord sang bangko, income tax return, mga dokumento sang insurance, corporate filings kag Statement of Assets, Liabilities and Net Worth ukon SALN.
Madumduman nga sang Oktubre 13, ginbaton sang Senate impeachment court ang pag-atras sang prosecution sa tatlo ka artikulo sang impeachment nga may kaangtanan sa ginapatihan nga sala nga paggamit sang confidential funds, bribery kag grave threats.
Bangud sini, ang alegasyon bahin sa indi mapaathag nga manggad na lamang ang nabilin nga usisaon sang korte.
Ginalauman nga magapadayon ang impeachment trial sa Nobyembre 9, kun sa diin posible nga ipresentar sang kampo ni VP Duterte ang ila mga ebidensiya, depende sa desisyon sang impeachment court sa pormal nga alok sang ebidensiya sang prosecution.
