Gin-usisa ni Senator-judge Bam Aquino kon ngaa ginkabig nga wala sang “economic justification” ang transaksyon nga nagpasulod sang ginatos ka milyon nga piso sa account sang Cale88 Foods Corp.
Suno sa Anti-Money Laundering Council (AMLC), may ₱319.33 milyon nga inward remittances halin sa China kag Hong Kong nga may kaangtanan sa Cale88 nga wala kuno sang klaro nga legal ukon trade obligation, purpose, ukon economic justification.
Ginpahayag ni Security Bank Branch Banking Group Head Leslie Cham nga ginkabig nga “suspicious” ang isa ka transaksyon kon wala ini sang dokumento nga nagapakita sang source of income ukon kun diin naghalin ang pondo.
Suno kay Cham, kabahin ini sang standard nga requirement sang mga bangko sa pag-usisa sang mga transaksyon. Apang wala niya direkta nga ginpatpat ang ₱319.33 milyon nga transaksyon sang Cale88.
