Gin-athag sang pribado nga abogado nga si Atty. Jasper Kent Perez ang mga legal nga proseso tuhoy sa kinamatarong sa pag-file sang Certificate of Candidacy (COC), pagdagan sa eleksyon, kag ang kahimtangan sang mga akusado sa mga mabug-at nga kaso kasubong sang plunder.
Sa isa ka interview sa Bombo Radyo Koronadal, ginpahayag ni Atty. Perez nga mahimo pa makapagwa ukon maka-exercise sang ila kinamatarong ang isa ka akusado sa pag-file sang COC ukon magdala-gan sa palaabuton nga eleksyon kon wala pa tawo nakaangkon sang pinal nga silot ukon final penalty.
Apang, gin-eksplekar niya nga kon ang ginapangatubang nga kaso isa ka mabug-at nga krimen kaangay sang plunder, may yara ini kaangot nga accessory penalties nga naga-disqualify sa isa ka tawo sa pagnegosyo ukon pagdagan sa pampublikong posisyon.
Dugang pa niya, bisan mahimo pa ma-exercise ang pag-file sang COC kon wala pa pinal nga hurisdiksiyon ang korte, mahimo man gihapon nga madulaan sang katungod nga magkampanya ang nagapangatubang sang amo nga kaso samtang nagapapili.
Tuhoy sa kahimtangan sang mga senador nga nakakulong, ginpahayag ni Atty. Perez nga ginlimitahan sang korte ang function kag ang kahilwayan ukon liberty sang isa ka akusado, rason kon ngaa ginabawalan man sila sa pagboto.
Ginpaambit man sang abogado sa publiko nga bisan pa ang mga naga-atubang sang ordinaryo nga kriminal nga kaso may kinamatarong mag-file sang petisyon ukon motion for bail, lain gid ang sitwasyon sa kasong plunder—kaangay sang ginapangatubang nanday Senator Jinggoy Estrada kag Senator Rodante Marcoleta—bangud ang plunder ginakabig nga non-bailable offense kon diin wala sila sang katungod nga magpasaka sang mosyon para sa pyansa.
