-- ADVERTISEMENT --

Nagapati ang Office of the Ombudsman nga mahimo na matapos sa sulod lamang sang isa ka tuig ang kaso nga nagaangot kay anay House Speaker Martin Romualdez, kasunod sang pagsungka sang isa ka co-accused nga preparado na magtestigo kontra sa iya.

Suno kay Ombudsman Jesus Crispin Remulla, makabulig sa pagpadali sang proseso ang kooperasyon ni Samchan Foreign Exchange Corp. President Felicito Guevarra, nga nagbalik sa gobyerno sang P324 milyon nga suno sa iya amo ang iya komisyon halin sa ginakwestyon nga transaksyon.

Ginpirmahan na man ni Remulla ang immunity agreement para kay Guevarra, nga magaserbe bilang state witness sa kaso.

Dugang pa sang Ombudsman, gusto nila malikawan ang wala sing kinahanglanon nga pagpauntat sang proseso agud indi na magdugay sing pila ka tuig ang pagtrial sang kaso.

Madumduman nga ginpasang-atan sang kaso sanday Romualdez kag anay Ako-Bicol party-list Representative Zaldy Co sang P7.44 bilyon nga plunder case may kaangtanan sa ginapatihan nga iregularidad sa mga kontrata para sa flood control projects.

Apang, ginpanginwala nanday Romualdez kag Co ang mga alegasyon batok sa ila.