Pagbulig sa katawhan ang nangin inspirasyon sang isa ka passer sa September 2026 Social Worker Licensure Examination matapos makakuha sang ika-9 nga pwesto sa nasambit nga eksaminasyon.
Sa interview sang Bombo Radyo Koronadal kay John Ryan B. Huqueriza, iya ginpahayag nga ang iya pagpalangga sa pagbulig sa iban ang nagtulod sa iya nga kuhaon ang kurso nga Social Work.
Suno kay Huqueriza, indi Social Work ang iya una nga plano nga kurso, apang sa ulihi iya nakita nga isa ini ka maayo kag makahulugan nga propesyon.
Ginpahayag man niya nga nangin inspirasyon niya ang oportunidad nga makabulig sa mga tawo, ilabi na sa mga nagakinahanglan sang suporta kag pag-atipan.
Samtang, nagbilin si Huqueriza sang mensahe sa mga estudyante nga nagakuha sang Social Work nga magpadayon bisan pa sa mga kabudlayan kag mga hangkat nga ila maatubang.
Ginpahanumdom man niya sila nga magpabilin nga mabakod, determinado kag may mataas nga pagtuo sa Mahal nga Makaako samtang ginatuman ang ila mga handum sa kabuhi.
