Gin-insister ni lead prosecutor Representative Gerville Luistro nga may katungod ang mga Pilipino nga personal nga mabatian ang sabat ni Vice President Sara Duterte sa mga alegasyon nga sakop sang impeachment case batok sa iya.
Suno kay Luistro, luyag sang prosekusyon nga ipatawag si Duterte bilang testigo matapos mapresentar ang tanan nga apat nga articles of impeachment, bilang kabahin sang prinsipyo sang transparency kag accountability nga nakasulat sa Konstitusyon.
Suno kay Rep. Luistro, importante nag mabatian mismo sang impeachment court, subong man sang publiko, kun paano sabton sang bise presidente ang mga alegasyon batok sa iya.
Apang nagpamatok ang kampo sang depensa, kag gin-insister nga indi mahimo pugson si Duterte nga magtestigo para sa prosekusyon bangud sa iya katungod batok sa self-incrimination.
Ginpahayag naman ni Luistro nga premature pa ang pagpamatok sang depensa bangud wala pa sang pormal nga mosyon ang prosekusyon para sa subpoena kay Duterte.
Suno sa korte, pagahulaton anay ang pormal nga mosyon sang prosekusyon kag komento sang depensa antes magdesisyon kun posible ipatawag ang bise presidente bilang testigo.
Samtang, ginpahayag man sang korte nga posible pa ini magpatawag sang dugang nga mga testigo sa diskusyon sang confidential funds, lakip sanday Colonels Raymund Dante Lachica kag Dennis Nolasco.
