Nagdeklarar sang Yellow Alert ang Mindanao Grid subong, Setyembre 9, 2026, halin ala-una sang hapon tubtob alas-9 sang gab-i bangod sa limitado nga operating margin sang power supply.
Suno sa pinakabag-o nga update alas-8 sang aga, yara sa 2,731 megawatts ang available capacity samtang nagalab-ot sa 2,600 megawatts ang peak demand.
Nagalab-ot naman sa 13 ka power plants ang yara sa forced outage, samtang anum ka planta ang nagadalagan sa derated capacity, nga nagresulta sa kabug-usan nga 769.7 megawatts nga indi magamit sa grid.
Lakip sa mga rason sang Yellow Alert ang indi pag-operate sang daku nga coal plants nga GNPK 2 kag GNPK 3 sa Mindanao.
Madumduman nga sang Setyembre 8, nagdeklarar man sang Red kag Yellow Alert ang Mindanao Grid bangod sa pag-trip sang Minergy Coal Unit 2 nga may kapasidad nga 50 megawatts kag pagtaas sang forecasted system demand sang yara sa 100 megawatts.
Sang amo nga tion, nagpatuman sang Red Alert halin alas-1 tubtob alas-4 sang hapon kag alas-5 tubtob alas-9 sang gab-i, samtang Yellow Alert naman halin alas-12 tubtob ala-una sang hapon, alas-4 tubtob alas-5 sang hapon kag alas-9 tubtob alas-10 sang gab-i.
Madumduman nga una na nga ginpaathag ni Engr. Benadette Buac, National Grid National Grid Corporation of the Philippines for Southwestern Mindanao Area, sa interview sang Bombo Radyo Koronadal nga ang Red Alert nagakahulugan nga indi bastante ang power supply para sa consumer demand kag regulating requirement sang transmission grid.
Samtang, ang Yellow Alert ginadeklarar kon kulang ang operating margin agud masabat ang contingency requirement sang transmission grid.
Sa karon, padayon naman nga ginamonitor ang kahimtangan sang Mindanao Grid bangod posible magbag-o ang power supply kag demand sa sulod sang adlaw.
