Nagapadayon ang pag-atubang sang krisis sang mga meat vendors sa South Cotabato bangud sa barato nga presyo sang live hogs kag mahal nga input costs.
Suno kay Jimmy Pasion, isa ka meat vendor sa Koronadal City, dako ang ila ginakaperdihan bangud sa nubo nga presyo sang buhi nga baboy, samtang mataas naman ang presyo sang mga kinahanglanon sa pagnegosyo.
Gindugang ni Pasion nga isa man sa mga rason sang paghinay sang ila baligya sa merkado publiko amo ang pagdamo sang mga talipapa.
Suno sa iya, indi patas ang kompetisyon bangud ang mga meat vendors sa merkado publiko kinahanglan magkuha sang nagkalain-lain nga dokumento kag permit antes makabaligya, samtang ang iban nga nagabaligya sa talipapa wala na nagahimo sa amo nga proseso.
Bangud sini, nagpanawagan si Pasion sa mga konsumidor nga magbalik sa pagpamakal sa merkado publiko agud mabuligan ang mga vendors nga makabawi sa nagapadayon nga krisis kag mabalik ang ila kita.
