Masalimuot ang sitwasyon sa panginobyerno sang pungsod bangud sa nagaluntad nga mga isyu sang kurapsyon kag mga alegasyon sang anomalya sa mga flood control project.
Ini ang ginpahayag ni Regolo Araña, isa ka residente kag traysikol driver sa Syudad sang Koronadal, sa interview sang Bombo Radyo Koronadal.
Suno kay Araña, nagapati siya nga political motivation ang impeachment trial batok kay Vice President Sara Duterte.
Iya ginbase ini sa iya panan-aw nga mabatyagan sang mga taga-Mindanao ang serbisyo publiko sang pamilya Duterte, gani indi siya pabor sa pag-impeach sa bise presidente.
Ginpabutyag man ni Araña ang iya mabaskog nga pagdumili sa impeachment proceedings batok kay Duterte.
Samtang, ginpanawagan man niya sa iya kasubong nga mga pumuluyo kag botante nga mangin maalam sa pagpili sang mga lider sa masunod nga eleksyon kag indi suportahan ang mga politiko nga ginakabig nila nga kurap.
Suno sa iya, importante nga gamiton sang mga botante ang ila tingog kag boto sa pagpili sang mga lider nga magaserbisyo sa interes sang katawhan.
