Nagpanawagan ang isa Registered and Licensed Psychologist sa publiko nga mangin responsable sa pagshare sang mga social media post nga may sulod nga pagpanghulga ukon pagpamahog. Sa interview sang Bombo Radyo Koronadal ginpahayag ni Nikko Lynn Ladera, RPsy, ang presidente sang South Cotabato Psychological Association nga ang padayon nga paglapta sang amo nga mga post mahimo mag-trigger sang “copycat” ukon “contagion effect,” nga posible mag-impluwensya sa kabataan kag iban pa nga tawo nga sundon ang ila makita online.
Tungod sini, indi dapat pagbalewalaon ang mga threats apesar pa ginakabig ini nga joke ukon wala pa ma-verify. Apang ginpahanumdom niya nga indi man maayo nga i-repost ang amo nga content bangod mahimo ini magdugang sang kahadlok, panic kag anxiety sa komunidad.
Mas maayo nga kuhaan ini sang screenshot kag i-report gilayon sa PNP ukon nagakaigo nga otoridad para sa husto nga pag-verify kag pag-trace sang source. Dugang ni Ladera, ang responsable nga paggamit sang social media isa ka importante nga tikang agud malikawan ang paglapta sang makahaladlok nga impormasyon kag maprotektahan ang publiko, labi na ang mga kabataan.
