Nagpanindugan si Taiwan President Lai Ching-te nga indi nila igasungka bisan isa ka pulgada ukon bisan dyutay nga bahin sang ila teritoryo.
Buot silingon sini nga ipakigbato sang Taiwan ang tagsa ka bahin sang ila duta, lakip ang mga dyutay nga isla kasubong sang Kinmen, Matsu, kag Penghu.
Ginpahayag ini ni Lai sa iya pagbisita sa Kinmen, isa ka frontline island sang Taiwan, kun diin naghatag siya sang mensahe sa atubangan sang mga war veteran bilang pagdumdom sa ika-68 nga anibersaryo sang 1958 Artillery Battle sang Agosto 23.
Ginpabutyag man ni Lai nga ang kalinong mahimo lang makab-ot paagi sa kusog.
Para sa iya, indi makuha ang kalinong paagi lang sa pagpangayo ukon sa paglaum nga indi magatake ang China.
Kinahanglan nga mangin mabakod ang militar sang Taiwan agud mapunggan ang iban nga pungsod sa pagsakop sa ila teritoryo.
Suno kay Lai, bisan malain ang panahon, nagkadto gihapon siya sa Kinmen agud ipahayag, sa ngalan sang bug-os nga pungsod, ang iya sinsero nga pagtahod kag pagpasalamat sa mga bagani nga naghiliusa sa pagpalagyo sang agresyon kag pagpanalipod sang ila duta.
Ginpahayag man niya nga sa sulod sang 68 ka tuig, wala untat ang China sa ila ambisyon nga magpalapad sang teritoryo.
Suno sa iya, amo ini ang nagadala sang tensyon kag kabalaka sa bug-os nga rehiyon sang Indo-Pacific.
Ang pagbatok sang Taiwan sadto, suno pa sa iya, nakabulig sa pagpugong sang ambisyon sang China nga kontrolon ang ginatawag nga “first island chain.”
